समाजामध्ये प्रत्येक मुलीस / स्त्रीस शांततेत समानतेचा तसेच शांततामय व आदरपुर्वक जीवन जगण्याचा अधिकार आहे

सदर उपक्रमादरम्यान मुख्यत: शाळा व महाविद्यालयाना भेटी देवुन ईयत्ता 8 वी ते ईयत्ता 10 वी व त्यावरील वर्गात शिकणारे विद्यार्थी व विद्यार्थीनी यांना सामाजिक लिंगभेद या विषयांबाबत प्रभोधन करुन त्यांच्या विचारांमध्ये सकारात्मक बदल घडविण्याचा प्रयत्न केला जातो. कारण हीच मुले उद्याची सुजाण नागरिक आहेत. अशा मुलांना त्यांना सांगितलेल्या गोष्टींचा मतितार्थ योग्यप्रकारे समजतात व ते योग्य रितीने आत्मसात करु शकतात. 

सदर उपक्रम तयार व प्रत्यक्षात अंमलात आणणे यामध्ये बहुमुल्य मदत केल्याबद्दल आम्ही मुंबई येथील अक्षरा या स्वयंसेवी संस्थेचे मन: पुर्वक आभार मानु इच्छितो, अक्षरा या स्वयंसेवी संस्थेने आमचे पथकास लैंगिक समानतेबद्दल आणि तरुण मुली व मुलांबरोबर कशा प्रकारे संवाद साधावा या बाबत मार्गदर्शन केले आहे.

तरुण मुली व मुलांच्या विचारामध्ये सकारात्मक बदल घडवुन सुरक्षित समाजाची निर्मिती करणे या अनुषंगाने समन्वयाने पुढाकार घेवुन प्रभावीपणे जन- जागृती करता येईल या उद्दिष्टाने पथकास सामाजिक लिंगभेद बाबत प्रशिक्षण देण्यात आलेले आहे.

सामाजिक लिंगभेद या समस्येबाबत सर्वांनी सजग च जागरुक होण्याची आवश्यकता आहे. ज्यायोगे सर्व या विषयावर सकारात्मक विचार करुन आणि त्यावर योग्य ती कृती करु शकतात व सुरक्षित समाजाची निर्मीती होणे शक्य होईल. महिला अत्याचाराचे घडणाऱ्या घटनांकडे बघता सदर घटनांमध्ये पिडीतेच्या मनावर होणारे परिणाम, दुःख, वेदना तसेच सदर घटनांमध्ये तिचे भविष्यावर होणारा परिणाम याबाबत आपणांस निश्चितच जाणीव होणे आवश्यक आहे. आपण समाजातील चुकीच्या विचारांचा दृष्टिकोण व गुन्हेगारी विचार हे मिटवलेच पाहिजेत. तरच आपण सर्वजण आपल्या समाजात शांततेने व सुरक्षितपणे व एकत्रित राहू शकतो.